Las autoritads svizras online
Las autoritads svizras online
Per mantegnair plazzas da lavur pon firmas reducir temporarmain u interrumper cumplettamain il temp da lavur dals collavuraturs. Sche passa 10 % da la lavur croda ora, discurran ins da lavur reducida.
Per mantegnair plazzas da lavur pon firmas reducir temporarmain u interrumper cumplettamain il temp da lavur dals collavuraturs.
Il patrun sto annunziar al chantun en scrit la lavur reducida planisada almain 10 dis avant che quella cumenzia. Sco persuna emploiada na stuais Vus sez far nagut. Il chantun examinescha, sche la lavur reducida è legitima e sch'ella serva effectivamain a mantegnair las plazzas da lavur.
Per introducir la lavur reducida dovra il patrun il consentiment en scrit da las persunas emploiadas. Vus avais il dretg da refusar la lavur reducida. Il patrun sto lura pajar vinavant il salari cumplain tenor il contract da lavur.
Exempel:
Inschigner, in uffant che sto vegnir sustegnì
Paja assicurada: 7'810 francs
(Sco paja assicurada vala – ditg simpel – la paja, da la quala las contribuziuns da la AVS èn gia vegnidas deducidas. Il 13avel salari mensil vegn er quintà, betg dentant spesas da professiun.)
| Situaziun da partenza | Calculaziun da la paja | Paja | Explicaziuns |
| A. Lavur reducida 50 % | 50 % paja dal patrun | 3'905.- | |
| 80 % da 50 % (indemnisaziun per lavur reducida) | 3'124.- |
plus supplement per uffants / per scolaziun, sco senza lavur reducida |
|
| Total 7'029.- |
Cumparegliaziun cun la dischoccupaziun
| B.Dischoccupaziun |
80% da 7'810 | Total 6'248.- | plus supplement per uffants / per scolaziun per di tenor la regulaziun chantunala, tant enavant che nagin auter na po far valair il dretg |
La lavur reducida n'ha nagina influenza sin la durada che Vus pudais retrair ina indemnisaziun da dischoccupaziun. Suenter la lavur reducida vegnan ils daners da dischoccupaziun calculads sin basa da la paja normala.
La lavur reducida n'ha medemamain nagina influenza sin Vossas contribuziuns per las assicuranzas socialas (assicuranza per vegls e survivents AVS, assicuranza d'invaliditad AI, urden da cumpensaziun dal gudogn CG, assicuranza cunter la dischoccupaziun AD). Ils patruns e las persunas emploiadas ston pajar las contribuziuns cumplainas er vinavant.
Sche Vossa lavur croda ora durant entirs dis u durant mezs dis, essas Vus obligà da surpigliar in'occupaziun intermediara, sch'il center regiunal per intermediaziun da lavur CIL As intermediescha ina tala.
Per dumondas davart las calculaziuns e davart las prestaziuns As drizzai per plaschair a la cassa da dischoccupaziun ch'è cumpetenta per la lavur reducida en Vossa firma (dumandar il patrun tge cassa ch'è cumpetenta).
Patruns, ma er persunas emploiadas dastgan desdir da tut temp la plazza durant ina fasa da lavur reducida, sch'els observan ils termins da desditga. Durant il temp da desditga sto il patrun pajar il salari cumplain a la persuna emploiada, e quai independentamain dal fatg, sch'ina occupaziun cumplaina è pussaivla u betg.
